1 сәуір  09:00-ден бастап республика бойынша 1-сыныпқа құжат қабылдау басталады, - деп хабарлайды Jambylinfo.kz

Білім және жоғары ғылым министрлігі биыл 370 мыңнан астам оқушы мектеп табалдырығын аттайды деп болжап отыр. Ведомтсвоның ақпаратына сәйкес, білім беру мекемелерінде орын тапшылығы болмауы тиіс. 

Құжат тапсыру реттілігі 

Мектепке алты жасар балалар мен жыл соңына дейін 6 жасқа толатын бүлдіршіндерді қабылдауға рұқсат. 
- ата-ананың немесе заңды өкілінің өтініші;
- денсаулық жағдайы туралы анықтамасы;
- баланың денсаулық паспорты;
- Сондай-ақ 3х4 өлшемді 2 сурет.

Білім беру ұйымдары осы тізімнен тыс өзге құжаттарды тапсыруды талап етуге құқығы жоқ. Құжат өткізудің бірнеше жолы қарастырылған.

Бірінші, электрондық үкіметтің еgov.kz порталы арқылы жүзеге асады. Ең алдымен электронды цифрлық қолтаңба кілтін (ЭЦҚ) алыңыз. Содан соң «БІЛІМ» бөліміне кіріп, «ОРТА БІЛІМДІ» таңдайсыз. Оның ішінде «1-СЫНЫПҚА ҚҰЖАТТАРДЫ ҚАБЫЛДАУ» тетігін басып, «ОНЛАЙН СҰРАУ» парағына өтіңіз. Өтінішті толтырып, жоғарыда атап көрсеткен құжаттар легін тіркейсіз.

Өтініш 1 жұмыс күні ішінде қаралады.

Екінші нұсқа - тікелей мектепке барып, құжаттардың көшірмесін өткізу. Яғни дүйсенбіден жұмаға дейін жұмыс уақытында өтініш қалдыра аласыз.

Ережеге сәйкес, балаларды конкурстық негізде қабылдау мен білім деңгейіне сай сыныптарға бөлуге тыйым салынған. Құжатты ерте тапсырғаныңызбен, балаңыздың 1-сыныпқа қабылданғаны туралы бұйрық 25 тамыздан кейін жарияланады.