180 қазақстандық Меккеге барамыз деп алданып қалды. «Жазира Travel» атты турфирма екі жүзге тарта азаматты Меккеге апарамыз деп уәдесінде тұрмаған. Енді жер-жерден жиналған азаматтар не қаржысын қайтара алмай, не Меккеге бара алмай отыр, деп хабарлайды Jambylinfo.kz. Qaz365kz сілтеме жасап. 

«19-20 қаңтарда Меккеге ұшуымыз керек болған. Екі топта 240 адам болған. Виза, билет дайындамаған. Бәрімізді алдап отыр. Әр адамнан 450-500 мың теңге алған. Ақша жоқ», - дейді азаматтар.

Ал турфирма иесі Мейіржан Рыскелдиев ақшаны қайтаратынын, сотталуды мақсат тұтпайтынын жеткізген.

«Құрметті ағайын, сіздерге қайтаратын ақшам жоқ. Ендігі айтар сөзім – жауапқа тартам десеңіздер, қолыммен істегенді мойныммен көтеремін. Егер кеңшілік жасаймын десеңіздер, әлбетте, рақметімді айтам. Қатесіз пенде жоқ. Дейтұрғанмен заң алдында жауап беруге дайынмын. Бір күн бойы ақша іздедім, таба алмадым. Айыбымды көтеруге дайынмын», - дейді Мейіржан.