Биылғы жылдың 1 ақпанындағы жағдай бойынша 31,9 мың отбасындағы 169,1 мың адамға 2,3 млрд теңге сомасына атаулы әлеуметтік көмек тағайындалды. 2025 жылы осы мақсатқа бюджеттен 132,9 млрд теңге қарастырылды, - деп хабарлайды Jambylinfo.kz

АӘК-нің негізгі мақсаты – ақшалай төлем түрінде қолдауды жүзеге асыру және отбасының еңбекке қабілетті мүшелерін жұмыспен қамтуға жәрдемдесудің белсенді шараларына тарту арқылы отбасын қиын өмірлік жағдайдан шығару.

АӘК келесі шараларды қамтиды:

Табысы кедейлік шегінен аспайтын азаматтарға тоқсан сайын әлеуметтік көмек тағайындау;

Табысы аз отбасылардағы 1 жас пен 6 жас аралығындағы әр балаға ай сайын 1,5 АЕК мөлшерінде қосымша төлем беру. 2025 жылдың 1 ақпанына дейін мектеп жасына дейінгі 52 мың балаға 305,1 млн теңге сомасында қосымша төлем тағайындалды;

Жұмысқа орналастыру, өз ісін ашуға ниетті отбасыларға гранттар беру, біліктілікті арттыру курстарына жіберу және басқа да шаралар арқылы жұмыспен қамтуға жәрдемдесу.
Қазіргі уақытта қазақстандықтар АӘК тағайындауға өтініштерді тұрғылықты жері бойынша мансап орталықтары, ауыл округінің әкімі немесе Электрондық үкімет порталы (egov.kz) арқылы бере алады.

2025 жылғы 1 қаңтардан бастап Қазақстандағы кедейлік шегі өңірлік медиандық табыстың 35%-ы деңгейінде белгіленген, бірақ өңірлік ең төмен күнкөріс деңгейінен 70%-дан төмен емес мөлшерде айқындалады.