Ranking.kz порталының дерегінше, Қазақстан азық-түлік бағасының қолжетімділігі бойынша өз позициясын нығайтқан. Еліміз өткен жылдың ортасында бұл көрсеткіш бойынша 146 мемлекеттің ішінде 34-орында болса, 2025 жылдың маусымында 21-орынға көтерілді, деп хабарлайды Jambylinfo.kz 

Рейтинг халықаралық Numbeo деректер алмасу платформасының есебіне негізделген. Елдер арасындағы баға салыстырмасында Нью-Йорктегі (АҚШ) бағалар базалық көрсеткіш ретінде алынған. Қалған елдердің бағасы сол деңгейден жоғары немесе төмен болып есептеледі.

Қазақстанда азық-түлік қолжетімділігі индексі 28% құрады. Бұл дегеніміз — еліміздегі тағам өнімдері Нью-Йорктен шамамен 72% арзан. Осындай көрсеткіштермен алғашқы 30 елдің қатарына Қазақстанның ЕАЭО мен Орталық Азиядағы көршілері — Өзбекстан (27%), Қырғызстан (27%) және Беларусь (26%) да енді. Ал Ресей тізімде 50-орынға жайғасқан, оның индексі – 35%.

2025 жылдың маусым айында азық-түлік ең қымбат саналатын ел Кайман аралдары болды — индекс 114%. Одан кейінгі орындарда Швейцария (112%) мен Исландия (103%) тұр.

Numbeo платформасының функционалы кез келген екі ел арасындағы өмір сүру құнын және азық-түлік бағасын пайыздық арақатынаста салыстыруға мүмкіндік береді. 2025 жылғы 25 қыркүйектегі мәліметке сүйенсек, Еуропа одағының ірі елдерінде, АҚШ-та және ТМД елдерінің көпшілігінде азық-түлік бағасы Қазақстанға қарағанда әлдеқайда жоғары. Мысалы, Швейцарияда баға біздегіден 321%-ға, АҚШ-та — 166%-ға, Германияда — 134%-ға қымбат.

Ұқсас экономикалық құрылымы бар көрші елдермен салыстырғанда да Қазақстанда азық-түлік арзанырақ. Айырмашылық аса үлкен емес, бірақ бәрібір байқалады: Ресейде баға 22%-ға, Арменияда — 30%-ға, Тәжікстанда — 24%-ға жоғары. Ең аз айырмашылық Орталық Азиядағы ең жақын көршілер — Қырғызстан, Әзербайжан және Өзбекстанмен байқалады.

Сонымен қатар, Numbeo дерегінше, Қазақстандағы орташа «таза» айлық жалақы 535 АҚШ долларын құрайды. Бұл көрсеткіш Еуропаның ірі елдерінен төмен, бірақ Орталық Азия мемлекеттерінің көбінен жоғары.