Биылғы жылдың алғашқы ведомствоаралық комиссия отырысы ҚР Оқу-ағарту министрлігінде өтті, - деп хабарлайды Jambylinfo.kz 

Жиында кәмелетке толмағандар арасындағы құқық бұзушылықтарды алдын алу, балалардың қауіпсіздігі мен әл-ауқатын қамтамасыз етуге бағытталған шаралар талқыланды.

Ресми мәліметтерге сәйкес, соңғы 10 жылда Қазақстанда жасөспірімдер қылмысы үш есеге төмендеген. Бұл оң өзгеріс елімізде кәмелетке толмағандар арасындағы құқық бұзушылықтарды анықтау мен тіркеу көрсеткіштерінің артуына қарамастан байқалып отыр. 2024 жылдың қорытындысы бойынша жасөспірімдер қылмысы 5%-ға төмендеген. Алайда Жетісу, Ұлытау, Павлодар, Ақмола, Қарағанды облыстарында, сондай-ақ Астана және Шымкент қалаларында әлі де нақты шаралар мен шешімдер қажет.

Ішкі істер министрлігінің өкілдері елімізде кәмелетке толмағандар арасындағы құқық бұзушылықтардың алдын алу бойынша кешенді жұмыстар жүргізілетінін атап өтті. Алайда, әлеуметтік ортаның қарқынды өзгеруі мемлекеттік органдар мен ата-аналардың белсенді қатысуын талап етеді. Бұл тұрғыда ҚР Оқу-ағарту министрлігінің Балалардың құқықтарын қорғау комитеті талдамалық материалдармен бөлісті.

Комиссия жасөспірімдер арасындағы құқыққа қарсы мінез-құлықтың себептерін зерделеп, оларды әлеуметтендіру мен алдын алу бойынша практикалық ұсыныстар жасады. ҚР Оқу-ағарту министрі Ғани Бейсембаев отырысты қорытындылап, жергілікті атқарушы органдарға алдын алу шараларын күшейтуді тапсырды. Сонымен қатар, құқықтық ағарту, тәрбиелік жұмыстар және бос уақытты тиімді ұйымдастыруға ерекше назар аударудың маңыздылығын атап өтті.

Мектептердегі ата-аналарды педагогикалық қолдау орталықтары мен аймақтық психологиялық қызметтердің жұмысына басымдық берілді. Бұл шаралар арқылы жасөспірімдердің өмір сапасын жақсарту, олардың әлеуметтік ортаға бейімделуін қамтамасыз ету көзделеді.