Көлік министрлігі халықаралық әуе қатынасын кеңейту аясында қазақстандық әуе компаниялар Грузия мен Қытайға жаңа рейстерді іске қосады, - деп хабарлайды Jambylinfo.kz

Грузия бағыты:
27 мамырдан бастап Air Astana әуе компаниясы Атырау – Тбилиси бағытында тікелей рейстерді бастайды. Ұшулар аптасына үш рет – сейсенбі, жұма және жексенбі күндері Airbus ұшақтарымен орындалады. Қазіргі уақытта Тбилисиге тікелей рейстер Алматы мен Ақтаудан ғана жүзеге асырылады.

Қытай бағыты:
28 мамырдан бастап SCAT әуе компаниясы Шымкент – Сиань бағытында тікелей рейстерді іске қосады. Ұшулар аптасына екі рет – сәрсенбі және сенбі күндері орындалады. Қазіргі уақытта Сианьға тікелей рейстерді Қытай әуе компаниялары Алматы мен Астанадан жүзеге асыруда.

Жаңа рейстердің ашылуы екі ел арасындағы сауда-экономикалық, инвестициялық, туристік және мәдени байланыстарды нығайтуға ықпал етеді.