Құжатқа сәйкес, қосылған құн салығын (ҚҚС) есепке қою шегін 80 миллион теңгеден 15 миллион теңгеге дейін төмендету ұсынылған. Алайда депутат Еділ Жаңбыршин бұл өзгерісті асығыс енгізудің тиімсіз болатынын айтты, - деп хабарлайды Jambylinfo.kz

Оның пікірінше, алдымен шағын және орта бизнестің үлесін 60 пайызға жеткізу керек, сонда ҚҚС түсімі де өздігінен артады. «Қазір елімізде импорт өсіп жатыр, бұл – өңдеуші өнеркәсіптің дамымағанының белгісі. Бірақ жаңа Салық кодексінде бұл мәселе мүлде қарастырылмаған. Неге біз машина жасау мен химия өнеркәсібін дамытуды ойламаймыз?» – деді ол.

Депутаттың айтуынша, дамыған елдерде шағын және орта бизнес экономиканың 50-60 пайызын құрайды, ал Қазақстанда бұл көрсеткіш 30 пайызға да жетпейді. Осы себепті ол ҚҚС шегін 15 миллион емес, 40 миллион теңгеге дейін төмендетуді ұсынды.