Ішкі істер министрлігі кезекті рет жол жүрісіне қатысушыларға үндеу жасады, - деп хабарлайды Jambylinfo.kz.   

Жолдағы қауіпсіздік мәселесі бойынша ІІМ әкімшілік полиция комитетінің ерекше тапсырмалар жөніндегі аға инспекторы Ақтоты Боранова түсіндірді.

- Құрметті жолаушылар, ауа-райының жылдам өзгеруі жол қауіпсіздігіне кері әсер етуі мүмкін. Сондықтан белгіленген қағидаларды сақтау өте маңызды. Қаңтар айында ел аумағында бораннан ірі жол апаттары тіркелді. Негізгі себеп – жолда жылдамдықты арттыру. Сондықтан азаматтардың өмірі мен денсаулығына қауіп төндірмеу үшін көлік көп жүретін жол учаскелерінде жылдамдықты шектеу туралы шешім қабылданды. Атап айтқанда, Астана – Щучинск және Астана – Қарағанды бағыттары бойынша 3.24 "Ең жоғары жылдамдықты сағатына 60 шақырымға шектеу" жол белгілері қойылды.     

Сондай-ақ Ақтоты Боранова көлік жүргізушілеріне ауа-райының нашарлауы туралы қалта телефонына келетін ескертулерге мұқият мән беруді атап өтті.

«Ауа райының нашарлауы туралы ескертулерде, сондай-ақ "Яндекс", "2GIS", "Indrive" және басқа да қосымшаларда енгізілген жылдамдық шегі туралы ақпарат көрсетіледі. Жолдарды ашу кезінде шектеулер алынып тасталады.   Біз баршаңызды жол ережелерін қатаң сақтауға және ауа райының өзгеруін ескеруге шақырамыз. Сіздің және айналаңыздағы адамдардың қауіпсіздігі жолдағы қырағылығыңыз бен жауапкершілігіңізге байланысты екенін еске салғым келеді. Жылдамдықты асырмаңыз, жолда сабырлық пен түсіністік танытыңыз. Бірлесіп қана біз жолдарымызды қауіпсіз ете аламыз», - деді ол