Алайда кез келген қарыздың арты оны өтеумен аяқталатынын, әрі оған қосымша пайыздар мен комиссиялар қосылатынын ұмытпаған жөн. Несие жүктемесі дұрыс есептелмесе, бұл отбасы бюджетіне айтарлықтай ауырлық түсіреді, - деп хабарлайды Jambylinfo.kz fingramota.kz-ке сілтеме жасап.

Сондықтан кредиттік міндеттемелерді алғанға дейін өзіңіздің қаржылық мүмкіндігіңізді нақты бағалау – маңызды қадам.

Борыш жүктемесінің коэффициенті деген не?

Несие алушылар үшін ең басты көрсеткіштердің бірі – борыш жүктемесінің коэффициенті (БЖК). Бұл – қарыз алушының барлық ай сайынғы төлемдерінің оның орташа табысына қатынасы. Яғни сіздің ай сайын төлеуге тиіс қарыз сомасы табысыңызбен салыстырылады.

Формуласы:

БЖК = (Ай сайынғы барлық төлемдер / Орташа айлық табыс) × 100%

Қазақстанда банктер мен микроқаржы ұйымдары бұл коэффициенттің 50%-дан аспауын талап етеді. Яғни сіздің табысыңыздың жартысынан көбі қарыз төлеуге кетпеуі керек.

Мысал ретінде:

Егер адамның ай сайынғы табысы 600 000 теңге болса және ол кредит бойынша 180 000 теңге төлеп отырса, онда оның БЖК-і – 30%. Бұл – қауіпсіз және банк үшін қолайлы деңгей.

Егер бұл көрсеткіш 50%-дан жоғары болса, жаңа кредит алуға деген өтініштің мақұлданбау ықтималдығы жоғары.

Кредиттік жүктемені қалай азайтуға болады?

Қарыз жүктемесін азайту – бұл бір сәттік қадам емес, бірақ дұрыс әрі жүйелі әрекет ете білсеңіз, оған қол жеткізу әбден мүмкін. Ол үшін барлық кредиттерден бірден құтылу шарт емес, керісінше, төмендегі әдістерді қолдану жеткілікті:

1. Қолданылмайтын кредиттік карталарды жабу немесе лимиттерін азайту

– Жиі пайдаланылмаса да, қолданыстағы кредиттік карталар БЖК-ны көтеруі мүмкін.

2. Қарыздарды қайта қаржыландыру

– Бірнеше кредитті бір жеңілдетілген несиеге біріктіру арқылы ай сайынғы төлем мөлшерін азайтуға болады.

3. Ұсақ қарыздарды мерзімінен бұрын өтеу

– Ай сайынғы жүктемені төмендетудің тиімді жолы.

4. Табысты ресми ету

– Егер сізде қосымша бейресми табыс көзі болса, оны заңдастыру арқылы жалпы табысты арттыра аласыз. Бұл төлем қабілеттілікті бағалауда оң нәтиже береді.

5. Бюджетті қайта қарастыру

– Қажетсіз шығындарды қысқартып, үнемделген қаражатты қарызды жабуға бағыттаңыз.

Қаржылық тұрақтылық – өз қолыңызда

Несие жүктемесін төмендету арқылы сіз тек банк алдындағы мүмкіндіктеріңізді арттырып қана қоймай, жеке және отбасылық бюджетіңізге де кеңістік бересіз. Ең бастысы – бұл қадамдар сіздің қаржылық тұрақтылығыңызды нығайтып, болашақта еркін жоспар құруға жол ашады.