Бердібек Соқпақбаевтың туғанына 100 жыл толуына орай, Жамбыл облыстық драма театрында «Менің атым Қожа» қойылымының премьерасы өтті, деп хабарлайды Jambylinfo.kz
      Балалар жазушысы Бердібек Соқпақбаевтың шығармасы желісіндегі қойылымның қоюшы-режиссері - Саламат Мырзатаев. Актерлер құрамы да білікті жас мамандардан құралған.  «Менің атым Қожа» әңгімесінің желісі бойынша сахнаға жол тартқан жаңа қойылымда мектеп жасындағы оқушы Қожаның бастан кешкен қызықты оқиғалары баяндалады.
      Ұйымдастырушылардың сөзінше, бұл киноматографиясы бар туынды. Көрерменді қызыққа толы, уайым-қайғысыз және қауіпсіз болған балалық шаққа саяхатқа апарады. Сол үшін жанры ностальгия, яғни аңсау деп алынған. Жалпы қойылымда өткен ғасырдың 50-ші жылдарындағы қазақ ауылының өмірі - сол кездердегі
қойшылардың слеті, окушыларды еңбекке баулып, қой қырку мен шөп шабуға апару, сондай-ақ пионерлер өмірі суреттеледі.  
      Премьераға Тараздағы Әл-Фараби атындағы жеке меншік мектебінің 1-3 сынып аралығындағы 250-ге тарта оқушысы келген. Аталған оқу ордасының бастауыш сынып мұғалімі Әлия Төлегенованың айтуынша, “Менің атым Қожа” шығармасы оқу бағдарламасында бар. 

- Бүгін облыстық драма театрға мектебіміздің оқушыларын әкелдік. Жалпы бұл шығарма балалар үшін өте қызық. Сол үшін де оқушыларымыз қойылымды бар ықыласымен тамашалады. Онда тәрбиелік мән бар. Басты мақсаттың бірі - балалар жазушысы Б. Соқпақбаев шығармасының мән- маңызы мен құндылығын оқушылардың бойына сіңіру,- деді ұстаз.