Таразда "қара нарыққа" қатысы бар деген қос күдікті ұсталды. Дәлірек айтсақ, қаланың  34 және 32 жастағы тұрғындары есірткі затын саудалап келген, деп хабарлайды jambylinfo.kz.

Жамбыл облыстық полиция департаментінің дерегінше, ұзақ уақыт бойғы жедел-тергеу нәтижесінде есірткі құралдарының заңсыз айналымына қатысы бар 2 азамат ұсталды. Олар синтетикалық есірткіні Тараз қаласында таратқан.

Іздеу шаралары кезінде күдіктілердің бірі үйіндегі жатын бөлмесіне жалпы салмағы 122,37 гр "мефедрон" синтетикалық затын жасырып қойған. Осылайша  330-дан астам доза есірткі тәркіленген. "Тауардың" қара нарықтағы құны 5,5 миллион теңге сомасында бағаланады. 

"Екі жақын дос Тараз қаласында есірткі заттарын сатумен айналысқан. Жедел қызметкерлер оларды ұзақ уақыт бақылады. Есірткі сатушыларды ұстау бойынша арнайы операция олардың тұтынушылармен алдын-ала кезекті «келісімінен» кейін өтті", - деді Есірткі қылмысына қарсы іс-қимыл басқармасының бастығы Әлім Бажықбаев.