Ұйымдасқан қылмыстық топтардың (ҰҚТ) құрамында болғаны үшін шамамен 150 адам қылмыстық жауапкершілікке тартылып, олардың басым бөлігі нақты бас бостандығынан айыру жазасына кесілді. Кейбіріне 20 жылға дейін түрме жазасы берілген.

ІІМ-нің ұйымдасқан қылмысқа қарсы күрес департаментінің өкілі Қуандық Алпыс бір қылмыстық топтың ісін ерекше атап өтті. Ол топ өз қызметін күзет мекемесі ретінде бүркемелеп, шын мәнінде қару сақтаумен және бопсалаумен айналысқан.

«Бұған қоса, трансұлттық сипатқа ие жеті ұйымдасқан қылмыстық топқа қатысты іс тергеліп жатыр. Сонымен қатар, бір қылмыстық қауымдастықты құру фактісі бойынша іс қозғалды», – деді ол.

Соңғы екі жылда ұйымдасқан қылмыстық топты құру, оған басшылық ету және қатысу фактілері бойынша 90-нан астам қылмыстық іс аяқталып, сотқа жолданған.

Олардың 13-і бойынша сот үкімі шығарылды. 130-дан астам тұлға бас бостандығынан айыру жазасына кесілді, кейбірі 20 жылға дейін түрмеге қамалды.

«Qarmet» АҚ нысандарынан ұрлық жасаған ҰҚТ-ға қатысты көпэпизодты іс аясында 24 адам түрлі мерзімге сотталды. Аталған топтың жетекшісі 12 жылға бас бостандығынан айырылды.