Brent маркалы мұнайдың бағасы барреліне 69 долларға дейін төмендеді – бұл алдыңғы күнмен салыстырғанда шамамен 3%-ға арзан, деп хабарлайды Jambylinfo.kz Reuters-ке сілтеме жасап.

АҚШ-тың WTI маркалы мұнайы да арзандап, баррелі 66 долларға түсті. Себебі – Таяу Шығыстағы қақтығыстардың бәсеңдеуімен мұнай жеткізіліміне қауіп төндіру ықтималдығы азайды. Бұл аймақ – әлемдегі басты мұнай өндірушілердің бірі екенін ескерсек, мұндай жаңалық нарыққа бірден әсер етті.

Тек мұнай емес, алтын да арзандады. Қазір бір унциясы шамамен 3338 доллар – бұл соңғы екі аптадағы ең төменгі баға. Күміс, платина және палладий де арзандап жатыр. Инвесторлар қақтығыстан қорғану үшін сатып алған активтерін кері сата бастады.

АҚШ доллары да әлсіреді. Бітім туралы хабардан кейін доллар еуро мен жапон иенасына қатысты арзандап кетті. Бұл – нарық қатысушыларының сенімі артып, жағдайдың тұрақталып келе жатқанын көрсетеді. Сондықтан «қауіпсіз айлақ» саналатын долларға сұраныс азайды.

Енді инвесторлар АҚШ Орталық банкінің басшысы Джером Пауэлдің сөзін күтіп отыр. Егер ол базалық мөлшерлемені төмендету туралы ишара берсе, доллардың құны бұдан да төмендеуі мүмкін.