2023-2024 оқу жылынан бастап Қазақстанда жоғары сынып оқушыларына жұмысшы мамандығы біліктілігін беру бойынша пилоттық жоба іске асырылуда,- деп жазады Jambylinfo.kz

 Еліміздің 17 өңірінде іске қосылған жоба кадрлар даярлауға көзделген жергілікті бюджет есебінен қаржыландырылады. Бастама мектептің  білім беру жүйесінің практикалық бағытын күшейтуге және жастардың жұмысқа ерте орналасуына мүмкіндік жасауға бағытталған.

«Кәсіптік даярлық колледждер базасында, ал жалпы білім беру пәндерін меңгеру мектептерде өтеді. 11-сыныпты бітіргеннен кейін оқушылар аттестат қана емес, орта техникалық білім туралы диплом да алады», - дейді Техникалық және кәсіптік білім департаментінің директоры Әсет Мұханбетов.

 Пилоттық жобаға 150-ге жуық колледж мен мектеп қатысуда. Жоғары сынып оқушылары еңбек нарығы үшін қажетті бағыттар бойынша білім алады, оның ішінде тамақтануды ұйымдастыру, автокөлікке техникалық қызмет көрсету және жөндеу, тігін өндірісі және киімді модельдеу, киім дизайны, графикалық және мультимедиялық дизайн, дәнекерлеу ісі, жиһаз өндірісі, шаштараз қызметі қамтылған.

 Бүгінгі таңда жобаға 2 мыңға жуық оқушы қатысуда. Биыл 905 түлек кәсіби біліктілікпен қатар еңбек нарығына бірден шығу мүмкіндігін алып, колледж дипломын алады.

Жоба техникалық және кәсіптік білім беру жүйесін трансформациялауға, экономиканың нақты секторының қажеттіліктеріне бағдарланған бәсекеге қабілетті адами капиталды қалыптастыруға арналған мемлекеттік стратегиялық бағыт шеңберінде іске асырылуда.