Министрдің айтуынша, вице-президент өкілді органның депутаты бола алмайды, қандай да бір өзге ақылы қызмет атқаруға, кәсіпкерлікпен айналысуға және саяси партияларға мүше болуға тыйым салынады. 

Вице-президент үшін белгіленген шектеулер, оның ішінде партияға мүше болмауы, депутаттық мандатқа және басқа ақылы қызметтерге тыйым салу елдің Ата заңымен бекітілген талаптарға ұқсас. 

Сонымен қатар, вице-президент Президенттің тапсырмасы негізінде елдің халықаралық деңгейдегі өкілдігін жүзеге асырады, негізгі мемлекеттік институттармен өзара байланыс орнатады, сондай-ақ азаматтық қоғам, ғылыми, мәдени және сараптамалық орта өкілдерімен диалогты дамытуға атсалысады. 

Аталған өкілеттіктер базалық сипатқа ие және қажет болған жағдайда Президент тарапынан нақтылауы мүмкін.

Егер вице-президент қандай да бір себептермен Президент өкілеттігін қабылдай алмаса, бұл өкілеттік Құрылтай төрағасына беріледі. Ал ол да мүмкін болмаған жағдайда, Президенттің міндетін Премьер-Министр атқарады.

— Президенттік өкілеттіктерді қабылдаған тұлға сәйкесінше вице-президент, Құрылтай төрағасы, Премьер-министр лауазымдарынан босатылады. Бұл жағдайда бос мемлекеттік лауазымдар Конституцияда көзделген тәртіппен алмастырылады. Қоғам үшін бұл сыртқы немесе ішкі жағдайларға қарамастан тұрақтылықты және мемлекеттің заңды және жүйелі түрде әрекет ететіндігіне толық сенімділікті білдіреді, — деп атап өтті ол.