Кәмелетке толмаған балаға қатыгездік көрсеткен тәрбиешіге сот үкімі шықты, - деп хабарлайды Jambylinfo.kz 

Іс материалдарына сәйкес, әйел 2023 жылдың қазан айынан бастап балабақшада тәрбиеші болып жұмыс істеген. Бір сабақта, сурет салу кезінде 2022 жылы туылған бала акварель бояуын аузына салған. Тәрбиеші оған ескерту жасап, ерніне қолмен соққы жасаған. Кейін ол баланың төбесіне соққы жасап, оны орындықтан көтерген. Әйел баланы жууға апармақ болып, оны мойнынан ұстап, алға қарай итерген, сонда бала құлап түскен. Содан кейін ол баланы қолынан көтеріп, жуынатын бөлмеге алып барған.

Әйел өз кінәсін мойындамады. Ол бала құлаған кезде оны дөрекі көтергенін мойындағанымен, соққы жасағанын теріске шығарды. Алайда тәрбиешінің кінәсі бақылау камераларының жазбаларымен расталды.

Сот оған 80 сағат қоғамдық жұмыс тағайындап, үш жыл бойы педагогтық қызмет атқаруға тыйым салды. Сондай-ақ, әйел бала туыстарына 200 мың теңге моральдық өтемақы төлеуі тиіс.