Іс материалдарына сәйкес, журналист Кирилл Павлов өзінің "Казахский чуваш" атты Telegram-арнасында Жамбыл облысындағы шегірткенің, оның ішінде итальян прусының таралуы туралы шындыққа сәйкес келмейтін мәлімет жариялаған, деп хабарлайды Jambylinfo.kz Informburo.kz-ке сілтеме жасап.

Ауыл шаруашылығы министрлігіне қарасты Мемлекеттік инспекция комитетінің Фитосанитарлық диагностика және болжамдар жөніндегі республикалық әдістемелік орталығы осы жарияланымға байланысты полицияға шағым түсірген.

"Аталған жарияланымда итальян прусының таралуы 5 миллион гектардан асады деген сияқты шындыққа жанаспайтын деректер бар", – деп атап өтті сотта.

Сот отырысында журналист өз кінәсін мойындамаған. Ол жариялаған деректерді ресми дереккөздерден алғанын айтқан. Ал Комитет өкілі Кирилл Павлов ресми сұранысты ведомствоға жарияланым шыққаннан кейін ғана жолдағанын мәлімдеген.

Сот шешімі бойынша журналистке 20 айлық есептік көрсеткіш (78 640 теңге) көлемінде айыппұл салынды. Бұл шешім әлі заңды күшіне енген жоқ.

"Мен Жамбыл облысының өзінде шегірткенің таралу аймағы 5 миллион гектардан асады деп жаздым. Бұл – бүкіл ел бойынша Ауыл шаруашылығы министрлігі өңдейтін 2,1 миллион гектармен салыстырғанда әлдеқайда көп. Сот бұларды тең нәрсе деп санап, мені кінәлі деп тапты. Ал шын мәнінде министрлік мәліметінше, ел бойынша зерттелуге тиіс аумақ шамамен 17 миллион гектар, бұл – менің болжамымды растайды", – деді журналист сот шешіміне қатысты.