Пирамиданы ұйымдастырғандар тұрғындарға «көлік пен баспананы пайызсыз, бөліп төлеп аласыздар» деп уәде еткен. Бірақ сол уәделердің көбі орындалмаған. Мүлік негізінен тек өздерінің туыстары мен таныстарына ғана берілген.

Ел бойынша 8 мыңнан астам азамат осы пирамидаға қаржы құйып, 21 миллиард теңгеден көп қаражатынан қағылған.

"Қылмыстық жолмен алынған ақшаны заңдастыру үшін ұйымдастырушылар бірнеше деңгейлі схеманы іске асырған. Олар «Алло, не керек», i-m@rketing, Gold SapaPremium атты компанияларды тіркеп, солар арқылы «жарнама қызметі», «талдау мен болжау» секілді жалған қызметтер көрсетілгендей етіп жасаған", – деді Қаржы мониторингі агенттігі.

Осы компаниялар арқылы ұйымдастырушылар 1,8 миллиард теңгеден астам қаражатты қолма-қол ақшаға айналдырып үлгерген. Сол ақшамен олар Астана қаласынан жеке үйлер мен пәтерлер, сондай-ақ қымбат көліктер – HUMMER H2 және Lexus LX570 сатып алған. Бұл көліктер сенімді адамдардың атына рәсімделген.

Сот кооперативтің мүлкі мен есепшоттарына тыйым салды. Ал пирамиданың негізгі ұйымдастырушысы қамауға алынды.