Полиция азаматтарды цифрлық кеңістікте қорғау үшін кешенді шаралар атқарып келеді. Қазіргі таңда дәстүрлі қылмыстар интернетке ауысып, алаяқтар заманауи технологияларды пайдалану арқылы азаматтардың қаржысын заңсыз иемденуде, деп хабарлайды Jambylinfo.kz 

ІІМ киберқылмысқа қарсы іс-қимыл департаментінің бастығы Жандос Сүйінбайдың айтуынша, мұндай қылмыстармен күрес заңнамалық, техникалық және профилактикалық бағытта қатар жүргізілуі тиіс. 2025 жылы байланыс операторларымен бірлесіп, 19 миллионнан астам жалған қоңырау бұғатталған, ал жүйе іске қосылғалы бері олардың саны 85 миллионнан асқан.

Сондай-ақ 100 мыңнан астам sim-карта тәркіленіп, 88 sim-box алынған. Шетелде 7 call-орталық, Қазақстан аумағында 6 call-орталық жойылды. Полиция азаматтарды кибергигиенаны сақтауға, күмәнді сілтемелерге өтпеуге, жеке деректерді ешкімге бермеуге шақырады.