Тараз қаласында №3 мектеп-лицейінің оқушыларына өңірдің мәдени және тарихи орындарына танымдық экскурсия ұйымдастырылды, деп хабарлайды Jambylinfo.kz polisia.kz сілтеме жасап. 

Іс-шара Жамбыл облысы полиция департаментінің есірткі қылмысына қарсы іс-қимыл басқармасы мен Тараз қаласы әкімдігінің ішкі саясат бөлімінің Жастар ресурстық орталығының бірлесуімен өтті. 

Оқушылар Қазақстандағы ең көне музейлердің бірі — 1931 жылы құрылған Жамбыл облыстық тарихи-өлкетану музейіне барды. Мұнда олар өлкеміздің мыңдаған жылдық тарихынан сыр шертетін экспонаттармен танысты. Әсіресе ежелгі түркі жазбалары мен тас мүсіндер павильоны оқушылардың қызығушылығын оятты.

Сондай-ақ, балалар Халық Қаһарманы, полиция капитаны Ғазиз Байтасовқа арналған естелік бұрышпен танысты. Сапар барысында оқушылар Айша-Бибі кесенесіне де барды. Мұнда аңызға толы махаббат хикаясы мен ортағасырлық сәулет өнерінің ерекшелігі жайлы мәлімет алды.

— Біз балаларға есірткінің зияны туралы айтып қана қоймай, олардың назарын әлдеқайда маңызды құндылықтарға — тарихқа, мәдениетке, нағыз батырлардың ерліктеріне аудартуымыз қажет деп есептейміз. Сонымен қатар бұл — жазғы демалысты пайдалы әрі танымдық тұрғыда ұйымдастырудың тиімді жолы. Балалар бос уақытын пайдалы нәрселермен өткізсе, зиянды әдеттерге деген қызығушылығы болмайды деп ойлаймыз,- деді Жамбыл облысы ПД ЕҚҚІҚБ бастығының орынбасары Асқар Жұмабеков.

Күн соңында балаларға балмұздақ таратылып, экскурсия әсерлі әрі көңілді аяқталды.