Сенаттағы дөңгелек үстел отырысына қордың Жекешелендіру және активтерді қайта құрылымдау департаментінің директоры Дастан Адиходжаевтың кеш келуі сенатордың сынына себеп болды, - деп хабарлайды Jambylinfo.kz ақпараттық порталы Newtimes.kz-ке сілтеме жасап. 

«Сіз кешігіп келіп, ал өзгелер уақытында келсе, бұл қол астыңыздағылар да осындай тәртіппен жұмыс істейтінін көрсетеді», – деді Мәкежанов.

Бұдан кейін сенатор қордың Президент тапсырмаларын орындаудағы төмен тәртіп деңгейін де сынға алды.

«Самұрық-Қазына» бұл мәселеге салғырт қарады. Ескерту жасаймын, басшылыққа жеткізіңіз – арнайы хат дайындалады», – деп ескертті ол.

Өз кезегінде Дастан Адиходжаев кешігу себебін түсіндіруге тырысты.

«Мен дәлізде тұрдым, кейін алтыншы қабатқа кетіп қалыппын...» – деді ол.

Алайда бұл жауап сенатордың көңілінен шықпады.

« Жұмыс тобы үш рет жиналды, бірақ сіздердің өкілдеріңіз қатыспады. Бүгін тек сағат үште ғана жартылай толық емес ақпарат келіп түсті. Сондықтан бұл туралы басшылыққа жеткізіңіз», – деп қосты Мәкежанов.

Дастан Адиходжаев жұмыс тобының бір отырысына қатысқанын айтқанымен, сенатор сөзін аяқтатпай, бөліп жіберді.

«Бізге түсіндірме жазба беріңіз. Ал қазір негізгі тақырыптан ауытқымайық», – деп сенатор сөзді басқа спикерге берді.