Астанада «ҚазМұнайГаз» ұлттық компаниясы» АҚ басқарма төрағасының бірінші орынбасары Құрманғазы Исқазиев пен CNOOC компаниясының Ресей және Орталық Азиядағы жобалар жөніндегі бас менеджері Лю Бо Бірлескен қызмет туралы келісім мен Қаржыландыру туралы келісімге қол қойды.
Аталған құжаттар стратегиялық серіктестікті және Каспий теңізінің солтүстік-шығыс бөлігіндегі транзиттік аймақта орналасқан жаңа «Жылыой» жер қойнауын пайдалану жобасын бірлесіп жүзеге асыру шарттарын бекітеді, - деп хабарлайды Jambylinfo.kz ҚазМұнайГазға сілтеме жасап.
Айта кету керек, CNOOC компаниясы Қазақстанға алғаш рет инвестиция салып отыр және бұл қадамды геологиялық барлау жобасынан бастады.
Серіктестік «Жылыой» жобасын 50/50 паритеттік негізде бірлесіп жүзеге асыруды көздейді. Бұл ретте барлау кезеңіндегі қаржыландыруды CNOOC қамтамасыз етеді.
Жоспарланған геологиялық барлау жұмыстарының ең төменгі жұмыс бағдарламасы:
➤ 3D сейсмикалық барлау (400 шаршы шақырым аумақтағы далалық жұмыстар, деректерді өңдеу және интерпретациялау);
➤ тарихи 2D деректерді (400 шақырым) қайта өңдеу;
➤ 2000 метр тереңдікте тұзүсті барлау ұңғымасын бұрғылау (тәуелсіз кезең);
➤ алынған 3D сейсмикалық деректерге байланысты 4500 метр тереңдікте тұзасты барлау ұңғымасын бұрғылауды (тәуелді кезең) қамтиды.
Айта кету керек, CNOOC (China National Offshore Oil Corporation) – мұнай-газ саласындағы әлемдік көшбасшылардың бірі. Компания барлау және өндіру саласына маманданған. CNOOC әлемнің 20-дан астам елінде ірі жобаларды жүзеге асырып, халықаралық серіктестермен белсенді ынтымақтастық жүргізіп келеді.
Ұқсас жаңалықтар
