Енді өмірге тікелей қауіп төндірмейтін жағдайлар бойынша (мысалы, жоғары қан қысымы, дене қызуы немесе жеңіл жарақаттар) жедел жәрдем емес, емханалар жанындағы мобильді бригадалар қызмет көрсетеді, - деп хабарлайды Jambylinfo.kz.

Аталған төртінші санаттағы шақыртулар тек күндізгі уақытта — таңғы 8:00-ден кешкі 20:00-ге дейін қабылданады. Мобильді бригаданың келу уақыты бір сағатқа дейін созылады.

Ал шұғыл жағдайларда (бірінші, екінші және үшінші санаттар) жедел жәрдем бұрынғыдай тез жетуге міндетті. Шақыртудың шұғыл деңгейіне қарай көмек 10-30 минут ішінде көрсетіледі.

Түнгі уақытта және демалыс күндері барлық санаттағы шақыртуларға жедел жәрдем бригадалары барады.

Айта кетейік, жедел жәрдемге жүгіну тәсілі өзгермейді — тұрғындар бұрынғыдай 103 нөміріне қоңырау шалып, кез келген уақытта көмекке жүгінуге құқылы.