Синоптиктердің болжамынша, алдағы күндері еліміздің солтүстік-батыс және солтүстік аймақтарына суық ауа массаларымен бірге жылдам енген қуатты солтүстік антициклон еліміздің барлық өңіріндегі ауа райын түбегейлі өзгертпек, деп хабарлайды Jambylinfo.kz 

"9 желтоқсанда солтүстік-батыс және солтүстік өңірлерге суық ауа массаларымен ұштасқан солтүстік антициклон жылдам енеді. Ол алдымен еліміздің солтүстік бөлігінде, кейін бүкіл Қазақстан аумағында жауын-шашынның тоқтауын және ауаның күрт суытуын әкеледі. Түнгі уақытта термометр бағандары солтүстік өңірлерде минус 22–30 градусқа дейін, шығыста минус 27–35 градусқа дейін, ал оңтүстік және оңтүстік-шығыста минус 10–20 градусқа дейін төмендейді", – делінген хабарламада.