Иә, қазір ақшаң болса, бәрін сатып алуға болады. Қазан ошақтың басында сағаттап наурыз көже дайындамай, ғаламторға кіріп, қалаған наурыз көжеңізді сатып алу қиын емес.

Қазақстан бойынша Оlx. жарнама сайтына 200-ге тарта адам наурыз көже пісіріп беремін деп хабарландыру берген. Бағалары да әртүрлі. Орта есепен 1 литрінің бағасы 1500-1800 теңгеден басталады.

Жарнама берушінің біріне хабарласқанымызда телефон тұтқасын алматылық Назым есімді аспаз көтерді. Ол соңғы он жылда наурыз көже сатып, табыс табатынын айтты. 

«1 литр наурыз көже – 1500 теңге. Егер 10 литрдан көп алған адамға +1 кг бауырсақ сыйлыққа беріледі. Тапсырыс берушілер жылдан жылға көбейіп жатыр. Сондықтан тапсырысты 2 күн бұрын беру керек»- дейді ол. 

Айта кетейік, биылдан бастап Қазақстанда Наурыз мерекесін тойлау он күнге созылып жатыр. Наурызнама онкүндігі бойынша, 14-24 наурыз аралығында елімізде Көрісу күні, Ұлттық киім күні, Жаңару күні сияқты айтулы даталар пайда болды. Кеше Таразда Ұлттық киім күніне орай бұрын-соңды болмаған шеру өтсе, бүгін Қазақстанда Жаңару күні тойланып жатқанын жазған едік.